Скачать с ютуб NUG တရားရုံး ဗုံးကြဲခံရမှု သားအမိနှစ်ဦးနဲ့ တရားရေး တာဝန်ခံ ဇနီးမောင်နှံ အပါအဝင် ငါးဦး သေဆုံး၊ в хорошем качестве

NUG တရားရုံး ဗုံးကြဲခံရမှု သားအမိနှစ်ဦးနဲ့ တရားရေး တာဝန်ခံ ဇနီးမောင်နှံ အပါအဝင် ငါးဦး သေဆုံး၊

စစ်ကိုင်းတိုင်း၊ ပုလဲမြို့နယ် မင်းတိုင်ပင်ကျေးရွာရှိ အမျိုးသားညီညွတ်ရေးအစိုးရ (NUG) တရားရုံးကို ဒီကနေ့ စစ်အုပ်စုက တိုက်လေယာဉ်နဲ့ ပေါင်(၅၀၀) ဗုံးနှစ်လုံး ကြဲချ တိုက်ခိုက်ခဲ့ရာ အသက် နှစ်နှစ်အရွယ် ကလေးငယ် သားအမိ၊ တရားရေးတာဝန်ခံနဲ့ ကိုယ်ဝန်ဆောင်သည်ဇနီး အပါအဝင် ငါးဦး သေဆုံးခဲ့ပါတယ်။ ဒီနေ့ ဒီဇင်ဘာ(၁၂)ရက် နေ့လည်(၁၂)နာရီဝန်းကျင်မှာ ပုလဲနယ်၊ မင်းတိုင်ပင်ရွာ NUG တရားရုံးကို စစ်အုပ်စုက တိုက်လေယာဉ်နဲ့ ဗုံးကျဲခဲ့တာ ဖြစ်ပြီး အထက်ပါအတိုင် ကလေးငယ်နဲ့ ကိုယ်ဝန်ဆောင် မိခင် အပါအဝင် ငါးဦး သေဆုံးသလို တစ်ဦး ဒဏ်ရာရတယ်လို့ ပုလဲမြို့နယ် ပြည်သူ့အုပ်ချုပ်ရေးအဖွဲ့ - ပအဖ ခေါင်းဆောင် ကိုဇော်ထက်က MFP ကို ပြောပါတယ်။ “ဒီနေ့ နေ့လယ် (၁၂) နာရီကျော်လောက်မှာ မင်းတိုင်ပင်ရွာက မြို့နယ်တရားရေးရုံး နေရာကို ဂျက်ဖိုက်တာနဲ့ ဗုံးလာကြဲတာပေါ့။ အဲဒီလို ဗုံးလာကြဲတော့ မြို့နယ်တရားရေး ဥက္ကဌနဲ့ သူ့ဇနီးရယ်၊ ကာကွယ်ရေး ရဲဘော်တစ်ဦးပေါ့။ သုံးဦး နေရာမှာတင် ပွဲချင်းပြီး သေဆုံးသွားတယ်။ နောက်ထပ် မိသားစု သုံးဦး ထိခိုက်တာက ဆေးရုံ ပို့တုန်းမှာ နှစ်နှစ်သားအရွယ် ကလေးရယ်၊ မိခင်ရယ် ဆုံးသွားတာပေါ့။ ကျန်တဲ့ ဒဏ်ရာရလို့ ဆေးကု နေရသူကတော့ အသက်အန္တရာယ်ဘေးကနေ လွတ်နိုင်မယ်လို့တော့ မျှော်လင့်ရတာပေါ့”လို့ ပုလဲမြို့နယ် ပအဖ ခေါင်းဆောင် ကိုဇော်ထက်က ပြောပါတယ်။ စစ်အုပ်စု လေကြောင်းကနေ ဗုံးကြဲလို့ သေဆုံးခဲ့ရသူတွေဟာ အသက်(၃၀)ကျော်အရွယ် ပုလဲမြို့နယ် တရားရေး တာဝန်ခံ ဥက္ကဌ ကိုပေါပြည့်အောင်နဲ့ အသက်(၂၀)ကျော်အရွယ် ကိုယ်ဝန်ဆောင်သည် ဇနီးဖြစ်သူ မသဲနုမြင့်ဇော်၊ အသက်နှစ်နှစ်အရွယ် ကလေးငယ်နဲ့ အသက်(၃၀)ဝန်းကျင် မိခင်ဖြစ်သူ၊ အသက်(၂၀)ကျော်အရွယ် ကာကွယ်ရေး ရဲဘော်တစ်ဦးတို့ ဖြစ်တယ်လို့ ဒေသခံ သတင်းရင်းမြစ်တွေက ပြောပါတယ်။ စစ်အုပ်စုက တိုက်လေယာဉ်နဲ့ ဗုံးကျဲလို့ သေဆုံးတဲ့ ပုလဲမြို့နယ် တရားရေး တာဝန်ခံ ကိုပေါပြည့်အောင်နဲ့ ဇနီး မသဲနုမြင့်ဇော်တို့ဟာ မကြာသေးခင် လပိုင်းကမှ မင်္ဂလာဆောင်ထားကြသူတွေဖြစ်ပြီး ဇနီးဖြစ်သူမှာလည်း ကိုယ်ဝန်ဆောင်ထားရသူ ဖြစ်တယ်လို့ ဒေသခံတစ်ဦးက ပြောပါတယ်။ “သူတို့နှစ်ဦးက မင်္ဂလာဆောင်ထားကြတာ မကြာသေးဘူး။ ကိုပေါပြည့်အောင်ရဲ့ ဇနီးမှာလည်း ကိုယ်ဝန်ဆောင် ထားရတယ်လို့ သိရတယ်။ စိတ်မကောင်းစရာတွေပါဗျာ”လို့ ဒေသခံက ပြောပါတယ်။ ဒဏ်ရာရသူ အမျိုးသားဟာလည်း သေဆုံးသူ နှစ်နှစ်အရွယ် ကလေးငယ်ရဲ့ ဖခင်ဖြစ်ပြီး သူတို့ မိသားစု သုံးဦး ရုံးချိန်း လာရောက်ချိန် စစ်အုပ်စုရဲ့ တိုက်လေယာသ်နဲ့ ဗုံးကျဲတာ ခံရပြီး ဇနီးနဲ့ သားသမီး ဆုံးရှုံးသွားတာလို့ ဆိုပါတယ်။ လက်ရှိမှာတော့ ထိခိုက် သေဆုံးခဲ့သူတွေ အားလုံးကို သင်္ဂြိုဟ်လိုက်ပြီလို့လည်း ဒေသခံတွေက ပြောပါတယ်။ ပုလဲမြို့နယ် NUG တရားရုံးကို တိုက်လေယာဉ်နဲ့ ဗုံးကျဲသတ်ဖြတ်ခဲ့မှုနဲ့ ပတ်သက်လို့ “PDF တွေ စုဝေးနေတဲ့ NUG ဌာနချုပ်ကို ပစ်ခတ်ရှင်းလင်းခဲ့တာကြောင့် NUG တရားရေး ဥက္ကဌ ဦးသိန်းအောင် ဆိုသူ အပါအဝင် PDF များ အသေအပျောက် များပြီး KIA တွေလည်း သေဆုံး ထိခိုက်ဒဏ်ရာရတာတွေ ရှိတယ်”လို့ စစ်အုပ်စုက သတင်းဖြန့်ပါတယ်။ အာဏာသိမ်းပြီးနောက် ပုလဲမြို့နယ်ထဲကို စစ်အုပ်စုက လေကြောင်းကနေ မကြာခဏ ဗုံးကျဲတိုက်ခိုက်သလို ရွာစဉ်ပတ်မွှေ လူသတ်၊ လုယက်၊ မီးရှို့တာတွေလည်း မကြာခဏ လုပ်ဆောင်နေတာ ဖြစ်ပါတယ်။ #Mandalay_Free_Press_MFP