Скачать с ютуб Боранқұл Көшмағанбетұлы "Мерген" күйі в хорошем качестве

Боранқұл Көшмағанбетұлы "Мерген" күйі

Мерген Әкем Көшмағанбет 12 жасынан мылтық атып, ит жүгірткен атақты аңшы еді. Аңның қандай жермен жүретінін, қай жерден су ішетінін жақсы білетін. Кешегi 1931-32 жылғы ашаршылықта 15 үйлі туыстарын мылтықпен асырап, жаманшылық көрсетпеді. Жекжат ағайындар ауыл ipгeciн сығалап отырды. «Көшекең бары болса кiсi iшсe, кісіге берсем, разы болса екен, ренжiмесе екен» деп отыратын. Сәл аздап домбыра тартатыны бар еді. Қара өлең айтысында топқа түсiп жеңетін. Ойды тік айтатын, ескі әңгімені де көп бiлетiн, мақал-мәтелшіл кiсi едi. 84 жасында қайтыс болып, асқар тауым құлады. Үш жыл ауырып, аяқ-қолы iстемей қалды. Сонда да жасымай, тәтті тілімен үйдің iшiн күлкіге кенелтiп отыратын. Басқа балаларына қарағанда әкенi баққан баласы - Мәдiғұл, келіні - Ұлтай, немерелері - Сәмет, Сейдрахман, Сейітмахан, Ғалия, кемпiрi - Базардың еңбектері ерекше болды. Бір сенбіде сәлем бере келдiм. Түні бойы әңгіме айтып отырдым. Әкем маған домбыра шерткізіп, менің шертпелерімді радиодан естіп отыратынын айтты. Мен туралы жиі берілетін репортажды да естіп отырады екен. Әкелік мейірбандылығымен жақсы тілек тілейтінін айтты. Сол түні әкемнің аңшылық кәсібінен көңілімде ой желілері өтіп жатты. Алыстан көрiнген аң, құс. Шеберлiкпен бұқпалап, аңның өкпе тұсынан шығуы елестедi. «Аңды ерінбеген атады, не көрінбеген атады», - дейтін. Бәрiміз таңертең әкейдiң қасына жиналып, дастарқанға отырдық. Қолыма домбыра ұстап ем, кенет "Мерген" күйiнiң сарынды екпiнi есiп жүре берді. – Мен сiзге "Мерген" деген күй шығардым, - деп орындай жөнелдім. Әкем терең күрсiнiп, дем алды.